O pasado sábado, auspiciado polo Foro Enrique Peinador, constituíuse a “Irmandade Galega de Adegueiros”

O pasado sábado, auspiciado polo Foro Enrique Peinador, constituíuse a “Irmandade Galega de Adegueiros” no Museo Galego do Viño, en Santo Andrés de Ribadavia,
IRGADE nace con 34 adegas e 8 empresas de distribución adheridas. Aí están dende as de maiores volumes como Martín Codax ou Terras Gauda, ata as dos pequenos colleiteiros, como a de Luis Ánxo Rodríguez de Viña de Martín (ata o pasado venres presidente da D.O. Ribeiro).

Os seus obxectivos son os seguintes:

1. Impulsar o proceso de galeguización dos produtos agroalimentarios.
2. Artellar unha estrutura capaz de establecer alianzas para unha mellor comercialización.
3. Procurar nas organizacións sociais que articulan e vertebran a sociedade galega (partidos, sindicatos e movemento sociocultural) que promovan entre os seus afiliados o consumo responsable, que consiste que modificar os seus hábito preferindo produtos etiquetados en galego e establecementos que se identifiquen coa cultura e lingua do País.
4. Conseguir o apoio das institucións públicas (universidades, Xunta de Galicia, deputacións e concellos) para facer posible o que establece o Estatuto de Autonomía de Galicia e Lei de Normalización Lingüística: “fomentar e potenciar o uso da lingua galega en todas as ordes da vida social e cultural de Galicia”.

O acto, vestido de gran solemnidade e arroupados entre outros polo Fiscal Xefe de Galicia, o Secretario Xeral de Política Lingüística, representante da Real Academia Galega e o presidente do Foro Enrique Peinador, D. Xosé González. Tamén acolleu o nomeamento “Irmandiños de Honra”: Antón Reixa presidente da SGAE, a Federación Galega de Turismo Rural, Instituto Galego de Análise e Documentación Internacional, ao importador chinés Jiang Feng, Toni, como me pediu que lle chamase, que é o grande impulsor dos viños españois en China, o cal me comentou que a pesar de que se “pirran” polos tintos, el ten claro que en breve se prostrarán ante os brancos de Galicia, a Asociación de Sumilleres de Galicia Gallaecia representada pola súa presidenta Mercedes González e da que me honro deser o actual vicepresidente e a Asociación Galega de Catadores, da que son o orgulloso presidente; que máis se pode pedir.

A parte do contido, eu téñoo ben claro, para min nunha botella de viño é un plus unha boa cápsula de estaño e un bo tapón de cortiza. E por suposto, tamén é un valor engadido unha etiquetaxe en galego. Non sei para ti, de que te fías máis, dun Montrachet etiquetado en francés, ou etiquetado en inglés ou en español?…….. Pois iso.